Í fyrsta skipti er jafn fjöldi kvenna og karla í framkvæmdastjórn Hafrannsóknastofnunar, í kjölfar ráðningar þriggja kvenna í störf sviðsstjóra. Þetta segir á vef Hafrannsóknastofnunar.

Eru því alls fjórar konur í framkvæmdastjórn stofnunarinnar en fyrir ráðningu þremenninganna var Berglind Björk Hreinsdóttir mannauðsstjóri.

„Fjöldi kvenna í framkvæmdastjórn hefur aldrei verið meiri í sögu stofnunarinnar og teljum við að með fjölbreyttum hópi stjórnenda skapist sterkari framtíðarsýn og öflugra teymi til þess að leiða stofnunina áfram inn í framtíðina,“ segir á vef stofnunarinnar.

Súrnun sjávar og hraðar afleiðingar við Ísland

Hrönn Egilsdóttir tók nýverið við sem sviðsstjóri Umhverfissviðs sem sinnir margvíslegum rannsóknum á umhverfi hafs og vatna.

Hrönn lauk BSc í líffræði frá Háskóla Íslands árið 2007, MRes frá háskólanum í Plymouth í Englandi árið 2008 og PhD í jarðvísindum frá jarðvísindadeild Háskóla Íslands árið 2017.

Í framhaldsnámi sínu rannsakaði Hrönn súrnun sjávar og líffræðilegar afleiðingar þeirra umhverfisbreytingar „sem nú eru einkar hraðar í hafinu við Ísland“. Hrönn hefur starfað við stofnunina á Botnsjávarsviði frá árinu 2017.

Rekið sundskóla samhliða

Harpa Þrastardóttir hefur verið ráðin inn sem nýr sviðsstjóri Sviðs gagna og miðlunar. Þar fara til að mynda fram sýnatökur og aldursgreiningar, hugbúnaðarþróun og önnur tölvuþjónusta stofnunarinnar.

Harpa er með BSc og MSc í iðnaðarverkfræði frá Háskóla Íslands og starfaði áður sem gæða-, umhverfis- og öryggisstjóri hjá Colas Ísland. Að auki hefur hún rekið Sundskóla Hörpu og kennt sund undir sínum merkjum.

Lengst af rannsakað strandsjó

Guðbjörg Ásta Ólafsdóttir var nýlega ráðin inn sem nýr sviðsstjóri Botnsjávarsviðs en á því sviði fara fram rannsóknir, vaktanir, stofnmat og ráðgjöf. Guðbjörg Ásta lauk BSc prófi í líffræði frá Háskóla Íslands árið 2000 og PhD frá háskólanum í St. Andrews í Skotlandi árið 2005.

Frá þeim tíma hefur hún lengst af unnið hjá Háskóla Íslands, fyrst í stöðu rannsóknasérfræðings, en lengst af sem forstöðumaður við Rannsóknasetur Háskóla Íslands á Vestfjörðum þar sem hún byggði upp sérhæfða rannsóknaraðstöðu til rannsókna á strandsjó.

Guðbjörg Ásta hefur fjármagnað og stýrt fjöldamörgum rannsóknaverkefnum á ferlinum og hafa rannsóknir hennar að miklu leyti tengst vistfræði fiska í strandsjó.

Tengdar fréttir

Hafrannsóknastofnun

Héldu í 34 daga uppsjávarleiðangur

• Fátt kom á óvart
• Ráðgjöfin sögð æra óstöðugan
• Þorskstofninn fari hægt minnkandi
• Beint: Ráðgjöf Hafrannsóknastofnunar

» Fleiri tengdar fréttir

• Blogga um frétt