Fyrsta tækið til að bólusetja

„Þetta er eitt mikilvægasta tækið sem komið hefur hingað inn,“ segir Sigurvin Hreiðarsson, aðstoðarstöðvarstjóri seiðaeldisstöðvar Arctic Fish í Tálknafirði. Hann segir frá nýjum og alsjálfvirkum búnaði til að bólusetja seiði, þeim fyrsta sem keyptur er til landsins. 

Tækið er frá Scala Maskon í Noregi. Sigurvin segir að það sé alsjálfvirkt frá dælingu úr kari og þar til búið er að bólusetja seiðin. Það stýri fiskinum inn á sig, geti flokkað hann og tekur myndir af hverjum einasta fiski sem fer í gegn, metur stærð hans og hvort fiskurinn er í lagi. „Þetta er stórt skref fram á við,“ segir Sigurvin.

Þegar seiðastöðin tók til starfa fór bólusetningin þannig fram að hver einasti fiskur var tekinn með höndunum og stunginn með sprautu. Undanfarin ár hefur verið notuð hálfsjálfvirk vél sem þó hefur þurft að mata. Fjórir til fimm starfsmenn hafi verið við að tína fiskinn upp í vélina og tveir við dælingu. Hafi verið sjö menn við bólusetninguna en nú annast einn til tveir starfsmenn þetta verk. 

Afköstin hafa aukist margfalt. Sigurjón nefnir að starfsfólkið hafi verið sátt við að ná sjö þúsund fiskum á klukkutíma með gömlu vélinni en nú séu afköstin 20 þúsund fiskar á klukkustund. 

Einn til tveir starfsmenn stjórna nýju tækjunum en áður þurfti sjö til að bólusetja laxaseiðin. mbl.is/Guðlaugur Albertsson