Kolbrúnu Ýr Oddgeirsdóttur flugumferðastjóra í Reykjavík brá í brún þegar hún áttaði sig á því að hún hefði fengið bónorð á mbl.is. Það gerðist þegar systir hennar hringdi í hana í gær og spurði hana hvort hún væri búin að skoða fréttamiðlana. Unnusti hennar, Helgi Andri Jónsson, stofnandi og forstjóri SalesCloud, var staddur í Svíþjóð. Hann sagði upp störfum hjá fyrirtækinu sem forstjóri og tæknistjóri og notaði tækifærið og bað Kolbrúnar í fréttatilkynningu sem hann sendi út. 

Frétt af mbl.is

Leggur fram bónorð í tilkynningu um starfslok

„Þeir sem að þekkja manninn minn skilja af hverju hann fór þessa leið. Það er bara einn Helgi. Eins rómantískur og hann er dagsdaglega, þá er fyrir honum að biðja manns á alnetinu - öðruvísi rómans og síðar meir skemmtileg saga. Ég bjóst ekki við þessari leið hjá honum, en hann kemur mér svosem á óvart á hverjum degi,“ segir Kolbrún Ýr og hlær. 

Hún segir að þetta hafi verið mjög óvænt og skemmtilegt. Parið hefur áður rætt brúðkaup en ekkert var ákveðið í þeim efnum. Þegar hún er spurð að því hvernig þau kynntust kemur í ljós að systir Kolbrúnar Ýrar leiddi þau saman. Hún var að vinna með Helga á þeim tíma og kom því í kring að þau myndu hittast. 

Er komin dagsetning á brúðkaupið?

„Nei, en það verður vonandi gott partí á næsta ári,“ segir hún og hlær.