Guðjón Davíð Karlsson, betur þekktur sem Gói, og eiginkona hans Ingibjörg Ýr Óskarsdóttir fögnuðu í gærdag 14 ára brúðkaupsafmæli sínu. Gói og Ingibjörg gengu í hjónaband hinn 22. ágúst 2009, en það var faðir leikarans, Karl Sigurbjörnsson, prestur og fyrrverandi biskup, sem gaf þau saman.

Leikarinn birti hjartnæma færslu á Facebook í gærdag þar sem hann fer fögrum orðum um eiginkonu sína í tilefni dagsins.

„Í dag eigum við Inga mín brúðkaupsafmæli. 14 ár af hamingju og gleði. Svo segi ég bara ég elska þig, takk fyrir allt og svoleiðis við hana prívat og persónulega,“ skrifaði Gói við mynd af parinu sem tekin var á brúðkaupsdaginn.

Gói er nú kominn á fullt í Þjóðleikhúsinu, en litríkar sýningar leikársins hefjast á komandi vikum og ætlar Gói meðal annars að elta veðrið í glænýrri gleðisýningu.

Smartland óskar hjónunum kærlega til hamingju með daginn!

Leikarinn birti einnig þessa skemmtilegu mynd af parinu á brúðkaupsdaginn ásamt elsta barni hjónanna. Skjáskot/Instagram