Rannsóknir gefa til kynna að fólk sýnist ófríðara borði það einföld kolvetni á morgnana eins og til dæmis hvítt brauð og ávaxtasafa.

Talið er að slíkur matur breyti blóðsykrinum og hafi áhrif á blóðflæðið til húðarinnar. Þannig líti fólk verr út en annars. Þetta kemur fram í umfjöllun The Times en niðurstöður rannsóknarinnar voru birtar í Plos One.

„Það kann að koma á óvart en það sem við látum ofan í okkur hefur áhrif á ytra útlit okkar,“ segir líffræðingurinn Clair Berticat hjá Montpellier háskólanum í viðtali við The Times. „Þessar breytur geta haft smávægileg áhrif á andlitsdrætti okkar og það hvernig aðrir líta á okkur og hvort þeim finnst við aðlaðandi.“

Rannsóknin fór fram í Frakklandi og náði til 52 karla og 52 kvenna á aldrinum 20-30 ára. Helmingurinn fékk morgunmat sem hækkaði blóðsykurinn eins og t.d. baguette með sultu, epli og appelsínusafa. Hinn helmingurinn borðaði gróft brauð með osti. Í báðum tilvikum innihélt morgunmaturinn 500 hitaeiningar.

Eftir tvo tíma var fólk leitt í myndatöku og passað var upp á að lýsingin væri ein í öllum myndatökunum. Þá var almenningur fenginn til þess að meta hversu aðlaðandi fólkið var.

Þeir sem borðuðu óholla morgunmatinn var að meðaltali minna aðlaðandi. Munurinn var tölfræðilega marktækur.