Forsvarsmenn breska fótboltaliðsins Crewe Alexandra vissu þegar á seinni hluta níunda áratugarins að Barry Bennell, þjálfari yngri deilda, hefði verið sakaður um kynferðislega misnotkun. Bennell hélt engu að síður áfram að þjálfa liðið árum saman að því er fréttavefur Guardian hefur eftir fyrrum formanni fótboltafélagsins.
Guardian hefur eftir Hamilton Smith að forsvarsmenn félagsins hefðu rætt um að reka Bennell, en að þeir hefðu talið sig ekki hafa nægar sannanir.
Frétt mbl.is: Þjálfarinn nauðgaði honum 100 sinnum
Fjórir fyrrverandi knattspyrnumenn hafa nú stigið fram og greint frá því að Bennell hafi misnotað þá í æsku. Forsvarsmenn Crewe hafa ekki tjáð sig um málið, en hafa áður sagt að verið sé að „rannsaka“ málið og „skoða betur“ innan félagsins.
Rannsakendur fjögurra lögregluumdæma hafa staðfest að verið sé að rannsaka ásakanir um barnamisnotkun í yngri deildum fótboltafélaga í landinu á árum áður.
Smith sagði við Guardian að forsvarsmenn félagsins, m.a. stjórnarformaðurinn Norman Rowlinson sem lést 2006, hefðu rætt málin á fundum. Bennell var ekki rekinn, en ákveðið var að hann mætti ekki lengur vera einn með drengjunum og tekið var fyrir að þeir fengju að gista á heimili hans.
Bennell er 64 ára í dag. Hann fékk fjögurra ára dóm fyrir að nauðga breskum dreng á fótboltaferðalagi í Flórída árið 1994. Þá fékk hann einnig níu ára dóm fyrir 23 brot gegn sex drengjum á Englandi árið 1998.
Bennell var svo stungið í fangelsi í þriðja sinn í fyrra er hann játaði að hafa beitt dreng ofbeldi í fótboltabúðum árið 1980.
Knattspyrnustjóri Crewe, Dario Gradi, segist fyrst hafa frétt af misnotkun Bennell er hann var dæmdur í fyrsta sinn.
Andy Woodward var sá fyrsti sem steig fram. Hann sagði að þegar hann var barn hefði Bennell beitt hann grófu ofbeldi. Hann grét í gær er tveir fótboltamenn til viðbótar, Chris Unsworth og Jason Dunford, komu fram opinberlega og sögðu frá sinni reynslu. Unsworth segist aldrei hafa sagt nokkrum manni frá ofbeldinu fyrr en nú, en Bennell nauðgaði honum allt að hundrað sinnum.
Forsvarsmenn ensku úrvalsdeildarinnar hafa lýst yfir áhyggjum af ásökununum og hafa hvatt alla sem búa yfir upplýsingum til að gefa sig fram. Þá hafa barnaverndarsamtökin NSPCC virkjað sérstaka neyðarlínu fyrir fórnarlömb eftir að misnotkunin var gerð opinber og hafa rúmlega 100 símtöl borist vegna málsins.