Bandarísk yfirvöld rannsaka nú hvort Rússland hafi komið að meintri efnavopnaárás sýrlenska hersins á almenna borgara. Þetta segir háttsettur embættismaður í Bandaríkjastjórn, sem vill ekki láta nafns síns getið.
„Hvernig er það mögulegt, þegar herafli þeirra var á sama stað og sýrlenski heraflinn sem skipulagði, undirbjó og framdi þess efnavopnaárás, að þeir hafi ekki haft vitneskju um það?“ segir embættismaðurinn í samtali við fréttastofu AFP.
„Við teljum að þessi spurning sé þess verðug að Rússar verði krafðir svara.“
Hann tekur fram að rannsókninni sé ekki lokið.