Samþykkja nýja hryðjuverkalöggjöf

Franska þingið hefur samþykkt nýja hryðjuverkalöggjöf.
Franska þingið hefur samþykkt nýja hryðjuverkalöggjöf. AFP

Franska þingið hefur samþykkt umdeilda hryðjuverkalöggjöf sem veitir yfirvöldum varanlega heimild til að framkvæmda leitir, loka bænhúsum og takmarka ferðafrelsi, svo eitthvað sé nefnt.

Lögin leysa af hólmi neyðarástand sem lýst var yfir í kjölfar hryðjuverkanna í París 2015. Neyðarástandinu verður formlega aflétt 1. nóvember nk. en það hefur verið framlengt sex sinnum.

Öldungadeild þingsins samþykkti hryðjuverkafrumvarpið í dag en það var samþykkt í neðri deildinni í síðustu viku, í kjölfar mikilla umræða. Aðgerðasinnar segja lögin ógn við mannréttindi í landinu en nýleg könnun bendir til þess að 57% þjóðarinnar séu fylgjandi lagasetningunni.

Emmanuel Macron Frakklandsforseti segir löggjöfina gera yfirvöldum kleift að tækla hryðjuverkaógnina án þess að ógna grunngildum frönsku þjóðarinnar. Hann hefur hvatt öryggisyfirvöld til að „fullnýta“ þau úrræði sem lögin veita þeim.

Meðal þeirra úrræða eru heimild til að takmarka verulega ferðafrelsi, loka bænhúsum sem kynda undir róttækni og að setja upp öryggistálma þar sem það er talið nauðsynlegt. Lögin veita yfirvöldum einnig umfangsmiklar leitarheimildir, sem efasemdarmenn óttast að muni leiða til áreitni í garð flóttafólks og minnihlutahópa.

Að sögn Macron hafa öryggisyfirvöld komið í veg fyrir 13 hryðjuverkaárásir það sem af er ári. Forsetinn segir m.a. stefnt að því að auka upplýsingasöfnun í fangelsum og ráðast í aðgerðir til að koma í veg fyrir að ungt fólk gangi hryðjuverkaöflum á hönd.

Emmanuel Macron Frakklandsforseti hefur hvatt öryggisyfirvöld til að „fullnýta“ þau ...
Emmanuel Macron Frakklandsforseti hefur hvatt öryggisyfirvöld til að „fullnýta“ þau úrræði sem löggjöfin kveður á um. AFP
mbl.is

Bloggað um fréttina

Mjög góður Runó Megane
Runó Mjög góður Runó til sölu. Bíllinn er mjög vel og lítið ekinn eða 162.000 k...
Tölvuþjónusta
Alhliða tölvuviðgerð, vírushreinsun, vírusvarnir, gagnabjörgun og verðtilboð. F...