Bandarísku flugfélögin American Airlines og United Airlines hafa fallist á að greiða verktaka 95,1 milljón dollara sáttabætur vegna árásanna Tvíburaturnanna í New York 11. september 2001 og er 13 ára málaferlum þar með lokið.
Tryggingafélög flugfélaganna munu sjá um greiðslu til fasteignafélagsins, World Trade Center Properties, sem er í eigu verktakans Larry Silverstein.
Sex vikum áður en árásin var gerð undirritaði Silverstein leigu á lóðinni til 99 ára, en lóðin er í eigu hafnaryfirvalda New York og New Jersey.
Silverstein hafði áður fengið 4,55 milljarða dollara bótagreiðslu frá eigin tryggingafélagi vegna turnanna eftir áralangar viðræður. Hann fór þó einnig í mál við flugfélögin vegna flugvélanna sem notaðar voru í árásunum. Upphaflega fór hann fram á 12,3 milljarða dollara bætur frá flugfélögunum og fyrirtækjum sem sjá um öryggiseftirlit á flugvöllum.
Rúmlega 2.750 manns létust í árásum al-Qaeda hryðjuverkasamtakanna á Tvíburaturnana.