Nicolas Sarkozy, fyrrverandi forseti Frakklands, sem nú er til rannsóknar vegna ásakana um að hafa þegið fé frá Moamer Gaddafi, fyrrverandi einræðisherra í Líbíu, í kosningabaráttu sinni árið 2007 segir engar haldbærar sannanir gegn sér vera í málinu.
Þetta kemur fram í yfirlýsingu frá honum sem franskir fjölmiðlar birta í dag.
„Ég er sakaður án nokkurra haldbærra sönnunargagna vegna yfirlýsingar sem Gaddafi, sonur hans, frændur hans, talsmaður hans og fyrrverandi forsætisráðherra hans, gerðu,“ segir í yfirlýsingu Sarkozys sem hann hefur einnig lesið fyrir dómara í málinu.
„Líf mitt hefur verið helvíti vegna þessa rógs sem byrjaði 11. mars árið 2011,“ segir Sarkozy en þann dag setti Gaddafi fyrst fram sínar ásakanir í málinu.
Sarkozy var handtekinn fyrr í vikunni og hefur verið yfirheyrður í tvo daga vegna málsins.