Saksóknari í Bandaríkjunum hefur ákært mann fyrir morðið á Mollie Tibbetts, tvítugri bandarískri stúlku sem saknað hafði verið frá því hún hvarf 18. júlí sl. Greint var frá því í gær að lík Tibbetts væri fundið og segir lögregla nú mann að nafni Cristhian Bahena Rivera vera ábyrgan fyrir morðinu.
Lík sem talið er vera af Tibbetts fannst undir stafla af maískorni á akri nærri heimabæ hennar Brooklyn í gær. Síðast spurðist til Tibbets þegar nágrannar sáu hana úti að hlaupa seint að kvöldi 18. júlí í nágrenni heimilis hennar í Brooklyn. Vinir Tibbets segja hana vera mikinn hlaupara og skoðaði lögregla m.a. gögn úr Fitbit-æfingaúri hennar við leit sína.
Tibbetts var að passa hund á heimili kærasta síns og bróður hans er hún hvarf og greindi bandaríska alríkislögreglan FBI frá því í síðustu viku að leitin beindist nú einkum að fimm stöðum í Brooklyn: bílaþvottastöð, tveimur bóndabæjum, stoppistöð fyrir flutningabíla og heimili kærasta Tibbets, en áður hafði verið greint frá því að kærastinn og bróðir hans lægju ekki undir grun.
Alríkislögreglumaðurinn Rick Rahn sagði á fundi með fréttamönnum að Rivera væri ólöglegur innflytjandi frá Mexíkó. Hann hefði séð Tibbetts koma hlaupandi og hefði elt hana. Eftir það muni hann ekki neitt. „Ég get ekki rætt um tilefnið,“ hefur BBC eftir Rahn.
„Ég get bara sagt ykkur að svo virðist sem hann hafi elt hana, að hann hafi laðast að henni á þessum ákveðna degi og að af einhverjum ástæðum hafi hann ákveðið að ræna henni.“
Sagði Rahn Rivera vera mjög samstarfsfúsan og viljugan að ræða við lögreglu og að það hefði leitt til líkfundarins. Það var skoðun á eftirlitsmyndböndum, sem sýndu Tibbetts úti að hlaupa og bíl Rivera, sem leiddi til þess að lögregla hafði uppi á honum.
Í ákæruskjali kemur fram að Rivera sé ákærður fyrir morð, en að sögn BBC mun hann hljóta lífstíðarfangelsisdóm verði hann fundinn sekur.
Eftir að greint var frá handtökunni sagði Donald Trump Bandaríkjaforseti við gesti á fjöldafundi í Vestur-Virginíuríki að glæpurinn „hefði aldrei átt að eiga sér stað“.
„Þið fréttuð í dag af ólöglega innflytjandanum sem kom því miður frá Mexíkó,“ sagði Trump við fundargesti. „Og þið sáuð hvað kom fyrir þessa einstöku og fallegu ungu konu.“ Hvatti forsetinn því næst flokksbræður sína í Repúblikanaflokknum til að mæta á kjörstað vegna þingkosninga í nóvember svo herða mætti innflytjendalöggjöfina.