Maður sem lagði á ráðin um að myrða rússneska blaðamanninn Arkadí Babchenko í Úkraínu var í vikunni dæmdur í fjögurra og hálfs árs fangelsi í Úkraínu.
Maðurinn, Borís Herman, játaði sök og hefur verið samstarfsfús við rannsókn málsins.
Maðurinn sem var ráðinn til þess að myrða rússneska blaðamanninn Arkadí Babchenko í Úkraínu segist hafa tekið þátt svo yfirvöld gætu safnað saman frekari upplýsingum um málið.
Oleksií Tsymbaliuk, sem er fyrrverandi prestur í úkraínsku rétttrúnaðarkirkjunni, segir að hann hafi látið leyniþjónustuna vita þegar Úkraínumaður hafði samband við hann og óskaði eftir því að hann dræpi Babchenko. Yfirvöld settu dauða blaðamannsins á svið og einhverjir stjórnmálamenn sökuðu Rússa um að bera ábyrgð á morðinu.
Öllum að óvörum kom Babchenko fram á sjónarsviðið daginn eftir og reyndist sprelllifandi. Viðurkenndi hann að morðið hefði verið sviðsett. Babchenko, sem er 41 árs, er þekktur fyrir gagnrýnin skrif sín á yfirvöld í Rússlandi. Samskipti stjórnvalda í Kænugarði og Moskvu hafa verið stirð allt frá því árið 2014 þegar Rússar innlimuðu Krímskagann og veittu vopnuðum uppreisnarsamtökum í austurhluta Úkraínu stuðning gegn stjórnvöldum í Úkraínu.
Tsymbaliuk segir að í apríl hafi Borís Herman haft samband við hann og beðið hann um að fremja morð. Eftir nokkur samskipti þeirra á milli fékk hann 14 þúsund Bandaríkjadali greidda fyrirfram fyrir morðið. Tsymbaliuk heldur að hann hafi verið fenginn í verkið vegna Herman, sem er vopnaframleiðandi, hafi talið að auðvelt væri að stýra honum.