Flak þýsks kafbáts frá tímum fyrri heimsstyrjaldarinnar hefur komið aftur upp á yfirborðið á strönd í norðurhluta Frakklands. Hann hefur legið grafinn undir sandi áratugum saman.
Kafbáturinn UC-61 strandaði við Wissant, sem er skammt frá Calais, í júlí árið 1917. Áhöfnin lét þá sjó flæða inn í bátinn til að sökkva honum og yfirgaf svæðið. Hann hefur ekki sést í rúmlega 80 ár, að því er segir á vef BBC.
Hann hefur vakið athygli ferðamanna sem gera sér ferð á ströndina til að berja flakið augum. Bæjarstjóri Wissant segir að það sé líklega tímaspursmál hvenær hann hverfur aftur sjónum manna.
Frá því í desember hafa tveir hlutar kafbátsins verið sýnilegir í fjöru um það bil 100 metra frá sandöldunum.
„Það sést lítillega í flakið á tveggja til þriggja ára fresti, en það fer eftir ölduhæð og veðri sem hefur áhrif á það hvernig sandurinn hreyfist, en ef það mun hvessa hressilega þá mun flakið hverfa á nýjan leik,“ segir bæjarstjórinn Bernard Bracq.