Tyrkneskur dómstóll dæmdi í dag fyrrverandi ástralskan rappara í sjö og hálfs árs fangelsi en hann starfaði með vígamönnum Ríkis Íslams í Sýrlandi áður en hann var handsamaður í Tyrklandi árið 2016.
Neil Prakash var handtekinn þegar hann reyndi að komast til Tyrklands frá Sýrlandi með falsaða pappíra í nóvember 2016.
Prakash, sem einnig er þekktur undir nafninu Khaled al-Cambodi, hefur verið tengdur við hryðjuverkaáform í Ástralíu og komið fram í áróðursmyndskeiðum. Hann er sakaður um að hafa fengið fjölmarga Ástrala, karla, konur og börn, til þess að ganga til liðs við hryðjuverkasamtök.
Prakash sagði við réttarhöldin að hann hefði hlotið þjálfun hjá vígamönnum í Raqa í Sýrlandi. Enn fremur sagðist Prakash sjá eftir því að hafa gengið til liðs við Ríki Íslams þegar hann sá hver áform þeirra voru í raun og veru.