11 látnir vegna flóða

Ár og vötn flæða yfir bakka sína í Nepal.
Ár og vötn flæða yfir bakka sína í Nepal. AFP

Að minnsta kosti 11 manns hafa látist í Nepal af völdum regnflóða og aurskriða vegna gríðarlegrar úrkomu á regntímabilinu. Óttast er að tala látinna eigi eftir að hækka því átta manns er enn saknað og 13 manns hafa slasast 

Þrír einstaklingar létust í höfuðborginni Kathmandu þegar veggur hrundi. Gríðarlega mikil rigning hefur verið frá því í gær sem hefur leikið austur- og suðurhluta landsins illa. Talið er að flóðið snerti um 870.000 íbúa á svæðinu. 

„Yfirvöld og öryggissveitir vinna að því að bjarga fólki og koma því í skjól. Þyrlur eru í viðbragðsstöðu ef á þarf að halda,“ segir Umakanta Adhikar við AFP-fréttamiðilinn. Búist er við að áfram muni rigna í dag og á morgun. Fólk varað við þeirri hættu sem skapast af þeim völdum.  

Í fyrra létust 150 manns í Nepal á regntímabilinu sem venjulega hefst í lok júní og nær fram til ágúst. 

Laganna verðir hjálpast að við að komast á milli staða.
Laganna verðir hjálpast að við að komast á milli staða. AFP
Björgunarsveitarmenn reyna að aðstoða fólk eftir fremsta megni.
Björgunarsveitarmenn reyna að aðstoða fólk eftir fremsta megni. AFP
mbl.is