Danska ríkisstjórnin er nú með til skoðunar að skikka alla ferðamenn, sem koma til landsins, í tíu daga sóttkví. Nick Hækkerup, dómsmálaráðherra Danmerkur, hefur lýst sig fylgjandi slíkum hugmyndum, en þær eru viðbragð við tillögum Íhaldsflokksins, sem situr í stjórnarandstöðu.
Íhaldsflokkurinn leggur til að sama leið verði farin á dönsku landamærunum og þeim íslensku, tvöföld sýnataka með nokkurra daga millibili.
Þess er þegar krafist að allir farþegar á leið til Danmerkur framvísi neikvæðu kórónuveiruprófi, sem ekki er eldra en tveggja sólarhringa, áður en þeir stíga upp í flugvél á leið til landsins. Þær reglur voru innleiddar með litlum fyrirvara fyrir rúmri viku með tilheyrandi vandræðum fyrir Íslendinga sem búsettir eru í Danaveldi og áttu bókað flug út eftir jólafrí á Íslandi.
Danska ríkisútvarpið, DR, tók nokkra farþega á Kastrup tali í dag, þeirra á meðal Önnu Kristinsdóttur, nemanda við Háskólann í Árósum, sem var á heimleið eftir jólafrí á Íslandi.
„Ég tel að það væri góð hugmynd fyrir Dani að notast við sömu reglur og á Íslandi, því ég gæti í raun hafa smitast á leiðinni hingað,“ segir Anna. Engar kröfur eru í gildi um skimun eða sóttkví við komuna til Danmerkur, en þó er boðið upp á sýnatöku fyrir þá sem vilja á flugvöllum auk þess sem ferðalangar eru eindregið hvattir til að afkvía sjálfa sig.
Anna ætlar sjálf í fjögurra daga sóttkví og síðan í sýnatöku enda vinnur hún með eldra fólki dag hvern.
Harðar samkomutakmarkanir sem tóku gildi í Danmörku skömmu fyrir jól hafa verið framlengdar til 7. febrúar. Þær hafa nú verið framlengdar í tvígang eftir að hafa upphaflega átt að gilda til 3. janúar og síðar til 17. janúar.
Allar verslanir nema matvöruverslanir verða áfram lokaðar og sama gildir um veitingastaði og kaffihús, hárgreiðslustofur, nuddstofur. Þó má selja mat og veitingar til að taka með heim.
Fjarkennsla verður í öllum skólum, bæði grunn-, framhalds- og háskólum. Kennsla í þeim síðastnefndu hefur að miklu leyti verið á netinu í allan vetur en það var þó ekki fyrr en stuttu fyrir jól sem staðkennsla var alfarið bönnuð. Sumir háskólar í landinu hafa gefið út að námið verði á netinu það sem eftir lifir annar, en aðrir þráast við að útiloka staðkennslu síðar í vor og halda nemendum og kennurum þannig í óvissu.
Nýjum kórónuveirutilfellum hefur farið snarfækkandi í Danmörku síðustu vikur eftir að hafa toppað vikuna fyrir jól. Ljóst er að hertar aðgerðir hafa borið árangur. Greind tilfelli hafa verið í kringum þúsund á dag síðustu daga, en fóru hæst yfir 4.000 á dag . Nýgengi veirunnar, smit á hverja 100.000 íbúa síðustu tvær vikur, er engu að síður hátt, um 505, eða tífalt á við hér á landi.
Í færslu sem Mette Frederiksen forsætisráðherra setur á Facebook á sunnudag segist hún hugsi yfir ákalli um tilslakanir á aðgerðum. Þrátt fyrir að nýjum smitum fari fækkandi sé ljóst að „breska afbrigði veirunnar“ – sem talið er mun meira smitandi – sæki í sig veðrið auk þess sem bóluefni berist ekki nógu hratt. Því muni taka tíma að ná smittölum niður.
Greinilegt er að tilslakanir eru ekki í kortunum hjá ríkisstjórn Mette Frederiksen.
„Á næstu dögum og vikum mun verða þrýst á ríkisstjórnina að opna landið. Mitt svar er: Við eigum á hættu að missa tökin. Við þurfum að ná smittölum niður. Við þurfum að standa föst á okkar og berjast áfram.“