Eiginkona íranska prófessorsins, Ahmadreza Djalali, sem starfaði við Karolinska Institute í Svíþjóð, hefur biðlað til Evrópusambandsins að tryggja að eiginmaður hennar yrði látinn laus, en hann var dæmdur til dauða árið 2017 fyrir njósnir.
Djalali, sem er með íranskan og sænskan ríkisborgararétt, var handtekinn í Teheran og hann sakaður um njósnir og andstöðu við guð þegar tók þátt í ráðstefnu í borginni vorið 2016.
Hann hefur búið lengi í Svíþjóð ásamt eiginkonu og tveimur börnum. Sérgrein hans er lækningar á hamfaratímum og stundar hann rannsóknir sínar í Stokkhólmi.
„Ég vona að Evrópusambandið geti gripið inn í með afgerandi hætti til að koma Ahmadreza heim,“ sagði Vida Mehrannia, eiginkona Djalali, við fjölmiðla.
„Evrópusambandið má ekki leyfa saklausum manni að vera myrtur á þennan hátt.“
Fjölmiðlar í Íran greina frá því að Djalali hefði átt að vera hengdur í dag og að írönsk stjórnvöld hafi ýtt á eftir því.
Mehrannia greindi hins vegar frá því að ekki hafi orðið úr því og að íranski dómsmálaráðherrann væri að íhuga að seinka dauðadómnum.