Að sögn Petró Porosjenkó, fyrrverandi forseta Úkraínu, hefur honum verið bannað að yfirgefa Úkraínu. Sakar hann ríkisstjórn forseta Úkraínu Volodimír Selenskí um að brjóta samkomulag um svokallað pólitískt vopnahlé.
Porosjenkó var forseti Úkraínu á undan Selenskí frá 2014 til 2019 og er í forustu fyrir næst stærsta flokkinn í Úkraínu. Hann hefur komið margoft opinberlega fram í sjónvarpi í Úkraínu síðan að innrás Rússlands hófst.
Eftir að stríðið hófst í Úkraínu bannaði úkraínska þingið nokkra flokka sem voru hliðhollir Rússlandi en gerðu samkomulag við aðra flokka um að vinna saman í svokölluðu pólitísku vopnahléi með sameiginlegan skilning um að setja allar deilur innanlands á ís til að geta sameinast gegn innrás Rússlands.
Í dag tilkynnti skrifstofa Porosjenkó að honum hafi verið meinað að fara yfir landamærin úr Úkraínu. Að sögn Porosjenkó er þetta brot á fyrrgreindu samkomulagi. Porosjenkó var þá á leiðinni til Litháen til að sækja þar fund með ýmsum evrópskum þingmönnum innan Atlantshafsbandalagsins (NATO) og hafði fyrir það fengið leyfi til að ferðast.
Í tilkynningu skrifstofu Porosjenkó kemur fram að þessi ákvörðun ögri samhug og samheldni úkraínsku þjóðarinnar í stríðinu.