Landsréttur staðfesti í gær dóm yfir föður sem hafði verið dæmdur í tveggja mánaða skilorðsbundið fangelsi í héraðsdómi fyrir að hafa tekið dóttur sína hálstaki á vinnustað hennar. Hann hafði hins vegar verið sýknaður af ákæru um að hafa hótað konunni lífláti.
Var manninum gert að greiða konunni 300 þúsund í miskabætur, auk þriggja fjórðu hluta sakarkostnaðar fyrir héraði og 830 þúsund í sakarkostnað í Landsrétti.
Maðurinn var ákærður í vor fyrir líkamsárás, hótun og heimilisofbeldi. Samkvæmt ákæru veittist hann að dóttur sinni í verslun þar sem hún var við vinnu í fyrra.
Í ákæru segir að hann hafi tekið hana kverkataki og ýtt henni utan í vegg með þeim afleiðingum að hún hlaut meiðsli af. Jafnframt hafi hann á sama tíma hótað henni lífláti.
Stúlkan lagði fram kæru á hendur föður sínum daginn eftir árásina í fyrra en embætti lögreglustjóra gaf út ákæru í maí 2017. Maðurinn var yfirheyrður vegna málsins í fyrra af lögreglu og staðfesti hann að hafa komið á vinnustað dóttur sinnar og þau hefðu rifist heiftarlega. Kvaðst hann hafa tekið í bol hennar við hálsmál. Hugsanlega hafi hann tekið í hálsinn á henni en hann kvaðst ekki muna það enda hafi hann verið svo reiður.
Hann greindi jafnframt frá því sem gerðist kvöldið áður en þá hefði dóttir hans hringt í hann og hellt sér yfir hann. Hún hefði ekki viljað að hann væri að skipta sér af hennar málum. Hann hefði ákveðið að fara á vinnustað hennar næsta dag og ræða við hana. Þegar þangað var komið hefði hann séð hana og gengið rakleiðis til hennar. Kannaðist hann við að hafa verið í nokkru uppnámi og misst stjórn á sér. Hann hefði gripið í fatnað hennar í bringuhæð. Nánar spurður og borinn undir hann framburður hans hjá lögreglu, kannaðist hann við að hafa gripið í hálsmál hennar og haldið henni þannig nokkra stund. Hann hefði svo sleppt og farið út.
Hann neitaði að hafa hótað henni lífláti en viðurkenndi að hafa verið hávær. Kona sem starfaði með dóttur mannsins varð vitni að því hvernig hann hélt um kverkar hennar með annarri hendi.
Í niðurstöðu héraðsdóms kemur fram að fallist sé á að maðurinn hafi ráðist á dóttur sína en sýkna beri hann af ákæru um að hafa hótað henni lífláti.