Smartland Mörtu Maríu | Stjörnuspá | mbl | 5.6.2020 | 11:11 | Uppfært 12:48

Hrúturinn: Þú ert fæddur leiðtogi

Elsku Hrúturinn minn, þó að síðustu mánuðir hafi verið svolítið skrýtnir þá ert þú að rísa upp úr öskustónni á fullri fart, allstaðar tækifæri!

Ef þér finnst þú sjáir ekki möguleikana er það einungis vegna þess að það er móða í huganum þínum. Þetta verður eitt besta sumar sem þú hefur séð og það er jafnvel skrýtið að segja það. Þú planar og finnur út hvernig þú leysir málin. Lífið stendur með þér og Alheimurinn er að sjá um að láta drauma þína rætast. Sumarið er þó ekki alltaf besti tíminn fyrir Hrútinn, því hann þarf að hafa nóg að gera til þess að vera í essinu sínu.

Þú tengir þig við þessa dásamlegu útgeislun þína og hefur svo mikil áhrif á aðra. Þegar fólkinu þínu og þér líður vel í kringum þig verðurðu sáttur. Þú lendir í aðstöðu þar sem þú þarft að stjórna öðru fólki, gerðu það á lipran máta, segðu frekar minna en meira og notaðu falleg orð.

Þú ert fæddur leiðtogi en ekki fylgismaður og ert svo einstaklega góður að fylgja reglum. Passaðu þig á hugbreytandi efnum, sérstaklega áfengi í sumar. Eina sem það gerir er að lama huga þinn og þá hverfur leiðtoginn í þér.

Þetta er tími ástarinnar fyrir þig og þú þarft líka að skipuleggja ýmislegt í kringum það. Það þýðir að efla ástina markvisst ef hún er til staðar, eða vera ákveðinn og ná í þann sem þú vilt, heppnin er með þér.

Ég dreg eitt spil úr töfrabunkanum mínum og spilið táknar sannleikann. Þú færð bæði að vita það sem þig vantar og verður líka að segja satt, annað mun ekki virka. Þetta spil gefur töluna 20 sem tengir við þetta ár, því þegar þú lítur tilbaka þá sérðu að allt er fullkomið.

Koss og knús, Sigga Kling

Þessi eru í Hrútsmerkinu:

Aretha Franklin, söngkona, 25. mars

Victoria Beckham, kryddpía, 17. apríl

Leonardo da Vinci, listamaður, 15. Apríl

Hera Björk Þórhallsdóttir, söngkona, 29. mars

Björgvin Halldórsson, söngvari, 16. apríl

Kári Stefánsson, vísindamaður, 6. apríl

Vigdís Finnbogadóttir, fyrrverandi forseti, 15. apríl