Dalvík/Reynir tryggði sér í dag sæti í 2. deild karla í fótbolta að ári með 1:1-jafntefli við KH á heimavelli í dag í 17. umferð deildarinnar.
Þorri Mar Þórisson kom Dalvík/Reyni yfir með marki á 16. mínútu áður en Pétur Máni Þorkelsson jafnaði á 87. mínútu og þar við sat. Dalvík/Reynir er með fjögurra stiga forskot á KF í þriðja sæti þegar ein umferð er eftir.
KFG er í öðru sæti, þremur stigum á eftir KH, eftir dramatískan sigur á Ægi á útivelli, 3:2. Ægir fékk niður í 4. deild fyrir vikið. Jóhann Ólafur Jóhannsson kom KFG yfir á 18. mínútu áður en Diego Minguez jafnaði fyrir Ægi. Jóhann Ólafur var aftur á ferðinni á 54. mínútu og kom KFG í 2:1. Emanuel Nikpalj jafnaði hins vegar fyrir Ægi á 65. mínútu en Magnús Björgvinsson kom KFG yfir í þriðja skipti á síðustu mínútunni með sigurmarkinu og felldi Ægismenn í leiðinni.
KF var í öðru sæti fyrir umferðina, en liðið gerði slæma ferð í Vesturbæinn og tapaði 2:0 fyrir KV. Jón Konráð Guðbergsson kom KV yfir strax á áttundu mínútu og Einar Már Þórisson bætti við öðru marki á 48. mínútu og þar við sat.
Sindri vann gríðarlega mikilvægan 3:2-sigur á Einherja og tryggði sér þar með áframhaldandi sæti í 3. deild. Tómas Leó Ásgeirsson kom Sindra yfir með eina marki fyrri hálfleiks áður en Todor Hristov jafnaði úr víti á 53. mínútu. Tveimur mínútum síðar skoraði Zlatan Gafurovic fyrir Sindra og á 57. mínútu skoraði Tómas Leo sitt annað mark. Georgi Ivanov lagaði stöðuna fyrir Einherja á 65. mínútu en sigur Sindra varð staðreynd.
Augnablik gerði 1:1-jafntefli við Vængi Júpíters á heimavelli. Arnór Brynjarsson skoraði sjálfsmark á 18. mínútu og kom Vængjum Júpíters yfir en Hrannar Bogi Jónsson jafnaði fyrir Augnablik á 71. mínútu og þar við sat.
Í lokaumferðinni berjast KFG, KF og Vængir Júpíters um hvert þeirra fylgir Dalvík/Reyni upp í 2. deild. Ægir er eina liðið sem fellur úr deildinni í ár þar sem liðum er fjölgað úr tíu í tólf fyrir næsta tímabil.
Staðan í deildinni: