„Það má setja upp hvaða fyrirsögn sem er. Þetta snýst um að ná góðri frammistöðu og ég trúi því að með góðri frammistöðu fáum við sigurinn,“ segir Freyr Alexandersson, aðstoðarlandsliðsþjálfari í knattspyrnu, spurður hvort um hreina katastrófu yrði að ræða ef Íslandi tækist ekki að vinna Andorra annað kvöld.
Íslenska landsliðið heldur í dag frá spænska bænum Peralada til Andorra la Vella, höfuðborgar smáríkisins Andorra, og mætir þar heimamönnum á morgun kl. 19.45 í fyrstu umferð undankeppni EM 2020.
„Við kynntum Andorra örlítið fyrir mönnum í upphafi ferðarinnar, ásamt öðrum andstæðingum í riðlinum, en förum út í smáatriðin í [gær]kvöld. Undirbúningurinn hér hingað til hefur snúist um okkur, að skerpa á grunnþáttunum í okkar leik í vörn og sókn,“ segir Freyr, sem er ekki upptekinn af þeirri staðreynd að íslenska liðið hafi tapað öllum fjórum leikjum sínum í Þjóðadeildinni síðasta haust og hafi ekki unnið sigur í rúmt ár:
„Ef ég á að vera hreinskilinn þá er ég bara búinn að ýta þessu í burtu. Ég veit alveg af því en núna er komin ný keppni og menn eru bara hungraðir í að vinna leiki og við þurfum að ná vindi í seglin í þessari stuttu keppni sem fram undan er. Menn hungrar í að spila fyrir Ísland og ná í sigur,“ segir Freyr.
Nánar er fjallað um íslenska landsliðið í íþróttablaði Morgunblaðsins sem kom út í morgun.