Birkir Bjarnason, landsliðsmaður í knattspyrnu, segir það langþráð að komast út á völl og spila eftir að hafa nánast ekkert leikið með félagsliði sínu, Aston Villa, á þessu ári. Hann segir formið þó vera gott og hann er til í slaginn með landsliðinu í komandi leikjum gegn Albaníu og Tyrklandi í undankeppni EM 8. og 11. júní á Laugardalsvelli.
„Það vita allir að þetta eru rosalega mikilvægir leikir. Þótt við höfum byrjað vel með þremur stigum gegn Andorra og Frakklandi, þá vitum við að við þurfum að ná í stig núna og helst sex. Það er mjög gott að geta spilað hérna heima. Við erum yfirleitt góðir hérna á sumrin og vonandi getum við haldið því áfram,“ sagði Birkir við mbl.is fyrir æfingu landsliðsins í dag.
Birkir kom aðeins við sögu í tveimur leikjum Villa frá 19. janúar, hvernig er standið á honum?
„Standið er bara fínt, svipað og fyrir síðustu leiki. Ég hef ekki spilað mikið síðan í janúar en hef æft mjög vel og mikið extra svo ég er í toppstandi,“ sagði Birkir, en veit hann hvað framtíð hans ber í skauti sér?
„Ég á eitt ár eftir af samningnum og svo sjáum við bara til hvað gerist í sumar. Ég er alla vega mjög ánægður þarna – nema það náttúrulega að hafa ekki spilað mikið síðan í janúar. Við verðum bara að sjá til hvað gerist, en ég hef ekkert rætt við klúbbinn enn þá,“ sagði Birkir.
Aston Villa komst upp úr ensku B-deildinni í vor og spilar í úrvalsdeildinni næsta vetur.
„Ég fór þangað því þetta er frábær klúbbur og það væri ekki leiðinlegt að spila í úrvalsdeildinni. Ég væri mjög til í að vera þarna og spila. En við sjáum til hvernig staðan verður eftir sumarið,“ sagði Birkir, sem kom frá svissneska liðinu Basel í janúar 2017.
Birkir kom við sögu í 17 deildarleikjum Aston Villa á leiktíðinni, 11 þeirra í byrjunarliði, en nánast ekkert eftir áramót eins og áður sagði. Hefur það haft áhrif á Birki að hafa verið svona úti í kuldanum hjá Villa í vetur?
„Nei nei. Ég hef verið í þessari stöðu áður og veit hvernig ég á að koma mér úr henni. Vonandi get ég gert það,“ sagði Birkir Bjarnason við mbl.is.