Spænski framherjinn Gonzalo Zamorano mun ekki leika með ÍA á næsta tímabili eftir að hann og félagið komust að samkomulagi um starfslok. Zamorano lék með Hugin og Víkingi Ólafsvík áður en hann gekk í raðir ÍA fyrir síðasta tímabil.
Zamorano skoraði 26 mörk í 42 leikjum með Hugin og Víkingi, en hann skoraði ekki eitt einasta mark í 20 leikjum í úrvalsdeildinni síðasta sumar.
„KFÍA vill þakka Gonzalo fyrir hans störf fyrir félagið og óskar honum velfarnaðar,“ segir í frétt á heimasíðu ÍA.
Þar kemur einnig fram að Spánverjinn hafi áhuga á að vera áfram á Íslandi.