„Ég er farinn frá HB og nú er algjör óvissa,“ sagði knattspyrnumaðurinn Brynjar Hlöðversson í samtali við Morgunblaðið í gær.
Brynjar hefur yfirgefið HB í Færeyjum eftir tvö ár hjá félaginu. Hann segir koma til greina að vera áfram í færeysku deildinni. „Ég er ekki búinn að loka á neitt. Mér leið rosalega vel úti,“ sagði Brynjar. Hann æfir hjá Val sem stendur en á ekki von á samningstilboði frá félaginu, þrátt fyrir að Heimir Guðjónsson, sem var þjálfari hans hjá HB, sé tekinn við liðinu.
Brynjar lék áður allan sinn feril með Leikni í Reykjavík og var fyrirliði liðsins áður en hann fór til Færeyja.