„Ég vonast til þess að halda áfram að þróa okkar leik í þessu verkefni,“ sagði Þorsteinn Halldórsson, þjálfari íslenska kvennalandsliðsins í knattspyrnu, á Teams-blaðamannafundi íslenska liðsins í dag.
Ísland mætir Írlandi í tveimur vináttuleikjum, dagana 11. júní og 15. júní, en báðir leikirnir fara fram á Laugardalsvelli.
„Við förum inn í þetta verkefni eins og við séum að fara spila venjulegan keppnisleik. Á Ítalíu vorum við búin að plana allar innáskiptingar, að mestu leyti, í fyrri leiknum gegn þeim.
Þar vorum við með fjórar skiptingar klárar, mínútu fyrir mínútu, en við förum ekki inn í þetta verkefni á þann hátt, allavega ekki í fyrri leikinn gegn Írum.
Við munum skoða hvernig leikmennirnir koma út úr leiknum á föstudaginn, hvernig standi þær eru í og annað, og meta svo stöðuna varðandi seinni leikinn eftir það,“ sagði Þorsteinn.
Þorsteinn tók við íslenska kvennalandsliðinu í lok janúar á þessu ári og er á leið inn í sitt annað verkefni með íslenska liðið.
„Við förum aðeins dýpra inn í ákveðna hluti núna en á Ítalíu. Ég sagði það fyrir síðasta verkefni að við myndum ekki fara yfir alla þá hluti sem við viljum innstimpla inn í liðið.
Við höfum reynt að dempa þetta aðeins niður og núna erum við að fara aðeins dýpra í ákveðna hluti, meðal annars hvernig við viljum verjast og eins varðandi hápressu og annað.“
Ísland er sem stendur í 17. sæti heimslista FIFA en Írland er í 34. sæti.
„Við ættum að vera sterkari en þær á pappír en á sama tíma þá eru þær fastar fyrir og spila mjög beinskeyttan fótbolta. Þær eru skipulagðar baka til, beita skyndisóknum og mjög sterkar í föstum leikatriðum. Þetta er kröftugt lið sem reynir að halda boltanum en getur líka spilað langt fram á völlinn,“ bætti Þorsteinn við.