Kristinn Jónsson, vinstri bakvörður KR-inga, var besti leikmaður júlímánaðar í úrvalsdeild karla í fótbolta að mati Morgunblaðsins.
Kristinn var annar tveggja leikmanna í deildinni sem fengu fimm M samtals í einkunn hjá blaðinu í júlímánuði en hinn var Sindri Kristinn Ólafsson markvörður Keflavíkur.
KR-ingar fengu tíu stig í fjórum leikjum í deildinni í júlí og Kristinn var mjög atkvæðamikill í stöðu vinstri bakvarðar en hann fékk tvö M í einkunn í tveimur þeirra.
Nikolaj Hansen, sóknarmaður Víkings, er í þriðja sinn í úrvalsliði mánaðarins og er eini leikmaðurinn sem hefur verið valinn í byrjunarlið þess í öll þrjú skiptin, í maí, júní og júlí.
KR fékk 29 M í júlí, Keflavík 25, Víkingur 23, Leiknir 19, Valur 17, Breiðablik 15, Fylkir 15, HK 15, FH 14, KA 14, ÍA 14 en Stjarnan fékk aðeins 7 M í júlí.
Úrvalslið júlímánaðar hjá Morgunblaðinu, byrjunarlið ásamt sjö varamönnum, má sjá í blaðinu í dag ásamt viðtali við Kristin Jónsson