Þetta er galið

Glódís Perla Viggósdóttir, leikmaður íslenska kvennalandsliðsins í knattspyrnu og Bayern München í Þýskalandi, gagnrýndi þá ákvörðun UEFA að spila á æfingavelli Manchester City í lokakeppni EM 2022 á Englandi næsta sumar á fjarfundi með blaðamönnum í gær.

Frétt af mbl.is

Völlurinn í Manchester allt of lítill

Miðvörðurinn hefur verið lykilmaður í íslenska liðinu undanfarinn áratug en hún er samningsbundin Bayern München í þýsku 1. deildinni.

Ísland leikur í D-riðli Evrópumeistaramótsins ásamt Frakklandi, Ítalíu og Belgíu en Ísland leikur tvo leiki í riðlakeppninni í Manchester þar sem aðeins er pláss fyrir 4.000 áhorfendur í stúkunni.

„Kvennaboltinn hefur verið í bakgrunni í allt of mörg ár en núna er loksins að koma smá bylgja sem er að lyfta kvennaboltanum á hærra stig, bæði í samfélaginu og í fjölmiðlum sem er frábært,“ sagði Glódís.

„Mér finnst það vanvirðing við kvennaboltann að spila á þessum velli og þetta er ekki í lagi. Það er mjög lélegt að UEFA hafi í raun samþykkt þetta. Það er uppselt á marga leiki hjá kvennaliðum víðs vegar í Evrópu, bæði félagsliðum og landsliðum þar sem um 15.000 manns eru að mæta á leikina.

Áhuginn er til staðar og þá verða að vera vellir til staðar líka. Vellirnir sem voru notaðir á EM 2017 í Hollandi sem dæmi voru miklu stærri og líka vellirnir á HM 2019 í Frakklandi og þar var uppselt á marga leiki.

Þetta er því alveg galið og þótt það séu ekki miklar líkur á því þá vona ég að leikirnir verði færðir því við getum fyllt mun stærri velli með bara Íslendingum, ef stemningin fyrir mótinu verður góð,“ bætti Glódís við.

Frétt af mbl.is

Kvennaknattspyrnan á betra skilið

• Blogga um frétt