Eigandi ítalska knattspyrnufélagsins Napoli, Aurelio De Laurentiis hefur sent Manchester United og Liverpool skýr skilaboð hvað varðar miðvörðinn Kalidou Koulibaly, hyggist ensku félögin reyna að fá hann í sínar raðir í þessum mánuði.
Fréttamaður Sky Sports, Jim White, skýrði frá því að hann hefði rætt við De Laurentiis og spurt hann um hvort tilboð hefðu komið í Koulibaly, sem er 29 ára gamall Senegali og þykir einn öflugasti miðvörðurinn í Evrópufótboltanum.
„Hann hló að því og sagði að hann væri ekki til sölu. Allir sem hefðu haft í hyggju að greiða minna en hundrað milljónir punda fyrir hann gætu gleymt því. Hann sé ekki til sölu nema eitthvert stóru félaganna á Englandi myndi leggja hundrað milljónir á borðið," sagði White.