Enska knattspyrnufélagið Tottenham og Atalanta frá Ítalíu hafa komist að samkomulagi um kaupverð á argentínska landsliðsmanninum Cristian Romero.
Tottenham greiðir ítalska félaginu 50 milljónir evra fyrir Romero, sem mun fljúga til London í vikunni og skrifa undir fimm ára samning.
Romero, sem er 23 ára, lék 42 leiki fyrir Atalanta á síðustu leiktíð en liðið hafnaði í þriðja sæti í ítölsku A-deildinni. Hann var áður hjá Juventus en lék ekki fyrir liðið.
Romero á fimm A-landsleiki fyrir Argentínu að baki. Hann lék m.a. úrslitaleikinn í Suður-Ameríkubikarnum í sumar þar sem Argentína vann 1:0-sigur á Brasilíu.