Heimir Guðjónsson, þjálfari færeyska knattspyrnuliðsins HB í Þórshöfn, fékk góðar fréttir í gær.
Einn af lykilmönnum liðsins, Símun Samuelsen, skrifaði þá undir nýjan eins árs samning við félagið. Hann er 32 ára gamall og er íslenskum knattspyrnuáhugamönnum að góðu kunnur en hann lék með Keflvíkingum frá 2005 til 2009 og átti afar góðu gengi að fagna með Suðurnesjaliðinu.
Heimir, sem yfirgaf FH í haust eftir glæsilegan feril, fyrst sem leikmaður og síðan þjálfari, tók við HB-liðinu í haust og æfingar liðsins fyrir tímabilið hófust í vikunni en keppni í færeysku deildinni hefst í mars.
Heimir er sigursælasti starfandi íslenski þjálfarinn en hann þjálfaði lið FH frá árinu 2008 og undir hans stjórn varð það fimm sinnum Íslandsmeistari, einu sinni bikarmeistari og komst tvívegis í umspil um sæti í Evrópudeildinni.