Sænska knattspyrnufélagið IFK Gautaborg freistaði þess að fá Kolbein Sigþórsson í sínar raðir frá Nantes.
Ekkert varð af sölunni þar sem Kolbeinn hefur glímt lengi við erfið hnémeiðsli og vildi því ekki taka þá áhættu að spila fjölda leikja á gervigrasi, eins og algengt er í Svíþjóð.
Þetta fullyrti Mats Gren, íþróttastjóri IFK Gautaborgar, við Aftonbladet í Svíþjóð í fyrrakvöld. Franski miðillinn 20 Minutes segist hafa fengið þessar upplýsingar staðfestar úr herbúðum Nantes.
Í frétt Aftonbladet segir að forráðamenn Nantes séu reiðubúnir að láta Kolbein fara ódýrt í ljósi langvinnra meiðsla hans og vegna hás launakostnaðar. Kolbeinn hefur ekki spilað leik fyrir liðið síðan í ágúst 2016, en hann var um það leyti lánaður í hálft ár til Galatasaray í Tyrklandi þar sem hann gat ekkert spilað vegna meiðslanna.
Kolbeinn mun þó vera á góðum batavegi núna og gerir sér vonir um að geta komist á HM í Rússlandi með íslenska landsliðinu.