Spánarmeistarar Barcelona eru í vandræðum vegna meiðsla varnarmanna liðsins en belgíski landsliðsmaðurinn Thomas Vermaelen varð fyrir meiðslum í viðureign Belga og Svisslendinga í Þjóðadeildinni um nýliðna helgi.
Vermaelen verður frá keppni næstu sex vikurnar en fyrir á sjúkralistanum var franski miðvörðurinn Samuel Umtiti sem er að glíma við hnémeiðsli.
Gerard Pique og Clement Lenglet eru einu miðverðir Barcelona sem eru heilir heilsu en fram undan eru leikir á móti Sevilla og Real Madrid í spænsku deildinni og í millitíðinni leikur við Inter í Meistaradeildinni.