Cristiano Ronaldo skoraði frábært mark fyrir Ítalíumeistara Juventus gegn sínu gamla liði, Manchester United, þegar liðin áttust við í riðlakeppni Meistaradeildar Evrópu í knattspyrnu í gærkvöld.
Mark Ronaldos á 65. mínútu stefndi í að verða sigurmark leiksins en United skoraði tvö mörk á síðustu fimm mínútum leiksins og tryggði sér sætan sigur.
„Við réðum ferðinni í 90. mínútur. Við fengum tvö eða þrjú dauðafæri og við hefðum átt að vera búnir að gera út um leikinn auðveldlega en okkur var refsað fyrir að slökkva á okkur,“ sagði Ronaldo eftir fyrsta tap Juventus á leiktíðinni.
„Það er aldrei gaman að tapa en kannski kom þessi ósigur á besta mögulega tíma. Við erum með frábært lið, við erum á toppi riðilsins og ég er sannfærður um að við vinnum riðilinn,“ sagði Ronaldo, sem hefur nú skorað 121 mark í 156 leikjum í Meistaradeildinni. Sturluð tölfræði það!