Barcelona endurheimti í kvöld níu stiga forskot á toppi spænsku 1. deildarinnar í knattspyrnu þegar liðið var sigurorð af Real Sociedad 2:1 á heimavelli sínum, Camp Nou.
Varnarmennirnir Clement Lenglet og Jordi Alba skoruðu mörk Börsunga í kvöld og skoraði Alba sigurmarkið á 64. mínútu eftir sendingu frá argentínska snillingnum Lionel Messi.
Barcelona færist þar með nær titlinum. Liðið er með 77 stig en Atlético Madrid hefur 68 stig í öðru sæti. Bæði lið eiga fimm leiki eftir.