Frábært að spila fyrir Heimi aftur

Birkir Bjarnason í leiknum gegn Frökkum á föstudag.
Birkir Bjarnason í leiknum gegn Frökkum á föstudag. mbl.is/Eggert Jóhannesson

„Ég heyrði í þeim fyrst fyrir tveimur vikum síðan og ég hafði áhuga á að kíkja á þetta. Ég skoðaði aðstæður og heyrði hvað þeir voru að pæla í og mér leist ágætlega á það og sló til,“ sagði Birkir Bjarnason, landsliðsmaður í fótbolta, um þá ákvörðun að ganga í raðir Al-Arabi í Katar á þriggja mánaða samningi.

„Aðstæðurnar hérna eru mjög flottar. Æfingaaðstöðurnar eru frábærar og alls ekki slæmt að búa hérna,“ sagði Birkir. Miðjumaðurinn komst að samkomulagi við Aston Villa um riftun á samningi sínum í ágúst og hefur hann því verið án félags í rúma tvo mánuði. Honum fannst það ekki endilega of langur tími. 

„Nei, ekki þannig séð. Ég var alveg að njóta mín heima í smá fríi. Það var langt síðan ég fékk gott frí. Það er hins vegar gott að vera kominn í lið.“

Heimir Hallgrímsson og Birkir Bjarnason ræða saman á HM í ...
Heimir Hallgrímsson og Birkir Bjarnason ræða saman á HM í Rússlandi. Ljósmynd/Skapti Hallgrímsson

Samningurinn er til þriggja mánaða og er Birkir opinn fyrir því að spila áfram í Katar, að honum loknum. 

„Ég ætla mér að spila fótbolta, koma mér í liðið og sýna mig. Svo sjáum við hvert framhaldið verður á því. Það er alltaf í stöðunni að vera lengur í Katar, hvort sem það er í þessu liði eða einhverju öðru. Ég geri mitt í þessa þrjá mánuði og svo sjáum við hvað gerist.“

Heimir Hallgrímsson er þjálfari Al-Arabi. Birkir spilaði lengi undir stjórn Heimis hjá landsliðinu og fóru þeir m.a saman á EM í Frakklandi og HM í Rússlandi. 

„Ég var með Heimi í einhver sex ár og þekki hann mjög vel og hvernig hann vill spila. Það er frábært að spila fyrir hann aftur og það er þægilegt fyrir mig,“ sagði Birkir. 

mbl.is