Aleksander Ceferin, forseti UEFA, segir að knattspyrnutímabilið í öllum deildum í Evrópu verði sennilega ekki klárað, ef ekki er hægt að byrja að spila aftur í síðasta lagi í júní.
Evrópska knattspyrnusambandið hefur nú stofnað starfshóp til að teikna upp þá möguleika sem eru í stöðunni vegna útbreiðslu kórónuveirunnar en nær öllum keppnum hefur verið aflýst ótímabundið vegna hennar.
Ceferin segir nokkra möguleika í stöðunni en hann er þó ekki fullviss um að hægt sé að klára tímabilið. „Enginn veit hvenær þessi heimsfaraldur endar,“ sagði hann í viðtali við ítalska fjölmiðilinn La Repubblica.
„Við erum með plan A, B og C: að byrja aftur um miðjan maí, í júní eða lok júní. Ef ekkert af þessu gengur upp þá er tímabilið sennilega glatað,“ bætti hann við en Ceferin staðfesti á dögunum að Liverpool verður ekki enskur meistari fari svo að ekki verði hægt að klára tímabilið í ensku úrvalsdeildinni.