Knattspyrnumaðurinn ungi Andri Lucas Guðjohnsen fór í aðgerð í gær eftir að hann sleit krossband í hné á æfingu með unglingaliði Real Madríd á dögunum.
Andri, sem er 18 ára gamall, verður sennilega frá næsta hálfa árið en aðgerðin gekk þó afar vel að sögn umboðsskrifstofu hans sem sagði frá á samfélagsmiðlum.
Andri hefur leikið vel með unglingaliði Real Madrid síðustu mánuði og var hann á lista The Guardian yfir 60 efnilegustu leikmenn heims sem eru fæddir 2002 eða síðar.
Kom það mörgum á óvart að Andri hafi farið til Real Madríd eftir að hafa leikið með yngri liðum Barcelona og Espanyol. Eiður Smári Guðjohnsen faðir hans lék á sínum tíma með Barcelona. Andri Lucas hefur leikið með U16, U17, U18 og U19 ára landsliðum Íslands og skorað tólf mörk í 28 leikjum.