Riðlakeppnin í Meistaradeild Evrópu í fótbolta hefst í kvöld með átta leikjum. Verða ensku liðin Chelsea og Manchester United m.a. í sviðsljósinu.
Stærsti leikur kvöldsins verður í París þar sem Manchester United heimsækir Paris SG. United vann eftirminnilegan sigur á franska liðinu í sömu keppni í 16-liða úrslitum fyrir tveimur tímabilum, 3:1, þar sem Marcus Rashford tryggði United farseðilinn í átta liða úrslitunum með marki í uppbótartíma.
Verður flautað til leiks klukkan 19 í París, rétt eins og í London þar sem Chelsea fær heimsókn frá Sevilla frá Spáni. Mætast þar tveir síðustu sigurvegarar Evrópudeildarinnar, en Chelsea vann keppnina í fyrra og Sevilla í ár.
Stórliðin Barcelona og Juventus, sem eru saman í riðli, leika einnig í kvöld. Juventus heimsækir Dynamo Kíev til Úkraínu og Barcelona fær heimsókn frá Ferencváros frá Ungverjalandi.
Leikir kvöldsins í Meistaradeildinni:
E-riðill:
19:00 Chelsea - Sevilla
19:00 Rennes - Krasnodar
F-riðill:
16:55 Zenit - Club Brugge
19:00 Lazio - Dortmund
G-riðill:
16:55 Dynamo Kíev - Juventus
19:00 Barcelona - Ferencváros
H-riðill:
19:00 Paris SG - Manchester United
19:00 RB Leipzig - Istanbul Basekeshir