Lazio vann gífurlega öruggan sigur á ríkjandi meisturum AC Milan, 4:0, þegar liðin áttust við í ítölsku A-deildinni í knattspyrnu karla í kvöld.
Fyrir fram var búist við hörkuleik enda liðin á svipuðum slóðum í deildinni.
Það reyndist þó alls ekki raunin þar sem heimamenn í Lazio léku á als oddi.
Sergej Milinkovic-Savic kom Lazio yfir strax á fjórðu mínútu og skömmu fyrir leikhlé tvöfaldaði Mattia Zaccagni forystuna.
Luis Alberto skoraði úr vítaspyrnu í síðari hálfleik og Felipe Anderson klykkti svo út með fjórða markinu stundarfjórðungi fyrir leikslok.
Með sigrinum fór Lazio upp í þriðja sæti deildarinnar þar sem liðið er nú með 37 stig, einu stigi á eftir AC Milan í öðru sæti.