HK er komið með frumkvæðið í einvígi sínu við Þrótt frá Neskaupstað í undanúrslitum Íslandsmóts karla í blaki, en HK vann fyrstu viðureign liðanna 3:1 í Fagralundi í kvöld.
Um hörkuleik var að ræða þar sem HK vann fyrstu hrinu 25:23 og aðra hrinu 25:23. Með bakið uppi við vegg náðu Norðfirðingar að vinna þriðju hrinu eftir upphækkun 26:24 og halda leiknum áfram, en HK vann fjórðu hrinu 25:18 og leikinn 3:1.
Andreas Hilmir Halldórsson var stigahæstur hjá HK með 20 stig en hjá Þrótti var Miguel Mateo allt í öllu með 41 stig af 64. HK endaði í öðru sæti Mizuno-deildarinnar í vetur með 29 stig en Þróttur í þriðja sætinu með 21 stig, en liðin voru hnífjöfn í innbyrðis viðureignum í deildinni.
Næsti leikur liðanna í einvíginu fer fram í Neskaupstað á föstudagskvöld. Í hinu einvíginu mæta deildarmeistarar og nýkrýndir bikarmeistarar KA liði Aftureldingar og verður fyrsti leikur þeirra á Akureyri annað kvöld.