Valdís naumlega úr leik

Valdís Þóra Jónsdóttir.
Valdís Þóra Jónsdóttir. mbl.is/Golli

Atvinnukylfingurinn Valdís Þóra Jónsdóttir úr golfklúbbnnum Leyni frá Akranesi komst ekki þrátt fyrir góða spilamennsku í gegnum niðurskurðinn á Actewagl Canberra Classic í Ástralíu en mótið er hluti af Evrópumótaröðinni í golfi.

Valdís Þóra lék annan hringinn á einu höggi undir pari en fyrsta hringinn á þremur yfir. Hún hefði þurft að leika höggi betur til þess komast áfram og var því ansi nálægt því að komast á lokahringinn sem fram fer í nótt. Valdís fékk þrjá fugla, tvo skolla og 13 pör á öðrum hringum í nótt og lauk leik í 60.-67. sæti.

Þetta er annað mótið á Evr­ópu­mótaröðinni á þessu ári en Val­dís hafnaði í 53. sæti í því fyrsta í Victoria-fylki í Ástr­al­íu um síðustu helgi.

Minjee Lee frá Ástralíu er í forystu en hún er á 14 höggum undir pari eftir ótrúlegan 63 högga hring í nótt.

Staðan í mótinu.

mbl.is