Usain Bolt golfíþróttarinnar

Golfheimurinn gæti verið að eignast nýja og afar kraftmikla stjörnu ef mið er tekið af frammistöðu hins 23 ára gamla Cameron Champ um liðna helgi.

Á aðeins sínu áttunda móti í PGA-mótaröðinni, eða sínu öðru sem opinber PGA-kylfingur, vann nýliðinn sigur en það er þó ekki endilega það sem vakið hefur mesta athygli.

Hafa ber í huga að Champ átti ekki í höggi við neina af bestu kylfingu heims á mótinu, sem fram fór í Jackson í Mississippi og nefnist Sanderson Farms-meistaramótið. Hann tryggði sér sigurinn með því að leika samtals fjóra hringi á -21 höggi, fjórum höggum betur en næsti maður, Corey Conners frá Kanada, á meðan Xander Schauffele sigraði á HSBC-heimsmótinu í Kína þar sem mun fleiri af bestu kylfingum heims léku um helgina.

En það að Champ skyldi samt vinna sitt fyrsta PGA-mót svo snemma á ferlinum, með frábærum endaspretti þar sem hann fékk til að mynda fimm fugla á síðustu sex holunum, hefur vakið athygli og svo ekki síður það hve ótrúlegan þunga hann getur sett í teighögg sín. Að meðaltali sló Champ 305 metra teighögg á mótinu sem er í góðum takti við það sem hann hefur gert á ferlinum hingað til. Dustin Johnson, Bubba Watson og Rory McIlroy hafa hvað oftast verið nefndir í umræðum um hver högglengsti kylfingurinn sé í PGA-mótaröðinni, en það var áður en Champ mætti á svæðið. „Ég hef aldrei séð svona hraða. Við erum í raun að horfa á Usain Bolt golfíþróttarinnar,“ sagði golfkennarinn kunni Sean Foley, leiðbeinandi Champ.

Sjá alla greinina í íþróttablaði Morgunblaðsins í dag