Atvinnukylfingurinn og Íslandsmeistarinn Guðmundur Ágúst Kristjánsson átti næstbesta hring dagsins á RAM Cape Town Open-mótinu í Áskorendamótaröð Evrópu í Suður-Afríku í dag.
Guðmundur lék á 66 höggum, sex höggum undir pari. Samanlagt er hann á tveimur höggum undir pari eftir tvo hringi. Guðmundur lék fyrsta hringinn í gær á 76 höggum og bætti sig því um tíu högg á milli hringja.
Íslandsmeistarinn er í 39. sæti ásamt nokkrum öðrum kylfingum, níu höggum á eftir heimamanninum Daniel van Tondere sem er efstur.
Guðmundur er kominn í gegnum niðurskurðinn og leikur þriðja hringinn á morgun og fjórða og síðasta hringinn á sunnudag.