Haotong Li frá Kína er efstur á PGA-meistaramótinu í golfi eftir að hafa leikið glimrandi vel á fyrstu 36 holunum en öðrum keppnisdegi lauk í Kaliforníu í nótt.
Staðan kemur á óvart en Li er þó ekki alveg óþekktur og hafnaði í 3. sæti á The Open Championship árið 2017. Hann er á átta höggum undir pari vallarins og lék í gær á 65 höggum.
Margir snjallir kylfingar koma næstir á sex höggum undir pari. Í þeim hópi eru Jason Day, Tommy Fleetwood, ólympíumeistarinn Justin Rose og Brooks Koepka sem sigrað hefur á PGA-meistaramótinu síðustu tvö ár. Bandaríkjamaðurinn Daniel Berger er einnig á sex undir pari og Frakkinn Mike Lorenzo-Vera sem komið hefur á óvart.
Tiger Woods átti fremur erfiðan dag í gær. Hann lék á tveimur undir pari fyrsta daginn og var þá í fínum málum en er á parinu samtals eftir að hafa leikið á 72 höggum í gær.
Staðan hjá öðrum völdum kylfingum:
Dustin Johnson - 4
Hideki Matsuyama - 3
Patrick Reed - 2
Bryson DeChambeau -2
Jon Rahm - 1
Webb Simpson -1
Rory McIlroy -1
Phil Mickelson +1
Jordan Spieth +1
Justin Thomas +1