ÍR-ingar unnu 69 marka nýliðaslag

ÍR hafði betur gegn Herði frá Ísafirði þegar nýliðarnir tveir í úrvalsdeild karla í handknattleik mættust í nýja íþróttahúsi ÍR-inga við Skógarsel í kvöld en lokatölur urðu 35:34 eftir hraðan og fjörugan leik.

ÍR er þá með fjögur stig eftir fyrstu fjóra leikina en Harðarmenn sitja á botninum og hafa tapað öllum sínum þremur leikjum. Þrír nýir Brasilíumenn sem komu til Ísfirðinga í vikunni voru ekki með í leiknum.

ÍR-ingar komust í 5:1 á fyrstu fimm mínútunum og þeir voru yfir allan fyrri hálfleikinn. Lengi vel munaði fjórum til fimm mörkum á liðunum en Hörður minnkaði muninn í 15:14 eftir 23 mínútur. ÍR komst aftur fjórum mörkum yfir og staðan var 19:16 í hálfleik.

ÍR-ingar héldu síðan þriggja til fjögurra marka forskoti nánast allan síðari hálfleikinn og voru komnir í 35:31 þegar hálf önnur mínúta var eftir. Ísfirðingar skoruðu hins vegar þrjú síðustu mörk leiksins.

Ólafur Rafn Gíslason átti stórleik í marki ÍR og varði 20 skot þrátt fyrir að liðið fengi á sig 34 mörk.

Mörk ÍR: Viktor Sigurðsson 10, Arnar Freyr Guðmundsson 9, Dagur Sverrir Kristjánsson 4, Sveinn Brynjar Agnarsson 4, Úlfur Gunnar Kjartansson 3, Friðrik Hólm Jónsson 3, Hrannar Ingi Jóhannsson 2.

Mörk Harðar: Mikel Amilibia 6, Suguru Hikawa 6 Endijs Kusners 5, Daníel Wale Adeleye 4, Jón Ómar Gíslason 3, Noel Virgil Bardou 3, Ásgeir Óli Kristjánsson 2, Óli Björn Vilhjálmsson 2, Tadeo Ulises 2, Victor Manuel Iturrino 1.

• Blogga um frétt