Pólverjinn Szymon Marciniak dæmir leik Íslands og Argentínu á HM í fótbolta sem fram fer í Moskvu næstkomandi laugardag. Íslendingar eiga góðar minningar af Marciniak, því hann hefur verið dómari í tveimur af betri sigrum íslenska liðsins á síðustu árum.
Marciniak er 37 ára og varð hann FIFA-dómari árið 2011. Hann er að dæma á sínu öðru stórmóti, en hann dæmdi einnig á EM 2016. Þar dæmdi hann m.a leik Íslands og Austurríkis, þar sem Ísland vann 2:1. Það var fyrsti sigur íslenska karlalandsliðsins á stórmóti frá upphafi.
Marciniak dæmdi einnig leik Íslands og Tyrklands í Tyrklandi í undankeppni HM í október á síðasta ári. Þá vann Ísland magnaðan 3:0-stórsigur sem fór langt með að tryggja sætið í lokakeppninni.
Lionel Messi, stórstjarna argentínska liðsins og leikmaður Barcelona, hefur hins vegar aldrei unnið leik sem Marciniak hefur dæmt. Hann dæmdi leik PSG og Barcelona, sem franska liðið vann 4:0 og í 3:0 tapi gegn Juventus, en þeir voru báðir á síðasta ári.