Saga Margrét Sigurðardóttir Blöndal, varnarmaður hjá Skautafélagi Akureyrar, er gengin til liðs við Troja Dam, sem leikur í sænsku 1. deildinni í íshokkí.
Saga er aðeins 15 ára og heldur upp á 16 ára afmælisdaginn sinn í september. Blaðamaðurinn Skapti Hallgrímsson greindi frá á Facebook-síðu sinni.
Þjálfarinn Johan Lindh segir á heimasíðu félagsins að hann hafi tekið eftir Sögu á HM fullorðinna fyrr á árinu og bætir við að hún væri að blanda sér í baráttu um sæti í 18 ára landsliði Svía, væri hún sænsk.
Saga er dóttir Guðrúnar Kristínar Blöndal og Sigurðar Sigurðssonar, sem eru bæði margfaldir Íslandsmeistarar í íshokkí með liðum SA.