Fyrsti leikurinn í úrslitarimmunni um Íslandsmeistaratitil karla í körfuknattleik fer fram á Sauðárkróki í kvöld og hefst klukkan 19:15.
Tindastóll tekur þar á móti KR en vinna þarf þrjá leiki til að verða Íslandsmeistari. Tindastóll hafnaði í 3. sæti í Dominos-deildinni í vetur en KR í 4. sæti. Skagfirðingar eiga þar af leiðandi heimaleikjaréttinn ef til oddaleiks kemur.
KR er Íslandsmeistari síðustu fjögurra ára en Tindastóll er bikarmeistari eftir sigur á KR í úrslitaleik í Laugardalshöll í janúar.
Tindastóll sló út Grindavík 3:0 og ÍR 3:1 á leið sinni í úrslitin. KR sló út Njarðvík 3:0 og Hauka 3:1 á leið sinni í úrslitin. Liðin hafa því leikið jafn marga leiki í vetur því þau fóru bæði alla leið í bikarúrslitin eins og áður segir.
Leikurinn verður í beinni atvikalýsingu hér á mbl.is í kvöld.