Stjórn körfuknattleiksdeildar Keflavíkur hefur ákveðið að senda Bandaríkjamanninn Milton Jennins og Búlgarann Georgi Boyanov heim og munu þeir ekki spila með liðinu á komandi leiktíð. Þetta kemur fram í frétt á karfan.is.
Leikmennirnir þóttu ekki standa undir þeim væntingum sem til þeirra voru gerðar og fá þeir ekki samning við Suðurnesjaliðið.
Bandaríkjamaðurinn Michael Craion verður hins vegar leikmaður Keflvíkinga en hann gekk í raðir félagsins í síðustu viku. Craion þekkir vel til Íslands og Keflavíkur, en hann lék með liðinu 2012-2014 og þaðan fór hann til KR þar sem hann lék til ársins 2016 og var tvisvar Íslandsmeistari. Var hann valinn besti erlendi leikmaðurinn þrisvar á fjórum tímabilum hér á landi.